اجراءات السفر الى تركيا بالسيارة الشخصية العراق

اجراءات السفر الى تركيا بالسيارة الشخصية العراق

اهواي سُياح يتسائلون بخصوص السفر الى تركيا بالسيارة الشخصية التفاصيل👇:-
١- اجازة دولية او اجازة مترجمة وسعرها بحدود الـ٧٠ الف.
٢- السيارة لازم تكون حرة وباسمك حصرًا مو وكالة ولا سنوية معوقين.
٣- تاخذ السيارة وتروح لدائرة الكمارك وياك السنوية والمستمسكات وينطوك علمود تاخذ دفتر الخروجية واهم شي تتأكد من رقم السيارة ورقم الشاصي صحيحات بالدفتر.
٤- الدفتر يكلف تقريبا من ١٥٠ الى ٢٥٠ الف حسب نوع السيارة احتمال اكثر شوية.
‏‎٥- تاخذ دفتر الخروجية والسنوية فقط وترجمهن للتركي ومصدق من السفارة حصرا.
٦- راح تكون مكمل امورك وتتوكل على الله تطلع على دهوك يعني بغداد سامراء بيجي تكريت موصل دهوك توصل لزاخو من زاخو ١٠ دقايق انت بلحدود العراقية منفذ ابراهيم الخليل قبل متدخل فول بانزين.
٧- وراها تدخل الحدود تطبك السيارة وتنزل تختم الجوازات خروج والسايق مال السيارة الي باسمة السنوية يكلة للضابط مال جوازات جاي بسيارتي حتى يختملة غير ختم بس السايق.
‏‎٨- وراها تطلع من الختم اكو ورقة اسمها ليسته تاخذ منها فد ٦ او ٧ هناك بلاش ينطوها تملي بيها معلوماتك الاسم واللقب ورقم الجواز مال الركاب كلها ورقم السيارة.
‏‎٩- بعدين تحرك بالسيارة همه يكلولك انطينه ليسته يختمون وحدة وتطبك على شباك يختملك الدفتر مال السيارة وتدفع وصل ب ٥ الاف فقط وتطلع من الحدود.
١٠- وراها تدخل الحدود التركية تتفتش السيارة شلون مجان وراها تمشي شوية ليكدام كرفان يختملك الجوازات وراها تطبك السيارة اكو مكتب صغير يسويلك تأمين للسيارة سعره من ٤٠ الى ٦٠ دولار وراها تمشي شوية ليكدام يجيكون السنوية واجازة السوق ودفتر الخروجية يسجلوها يمهم وتتوكل تعبر الحدود.
‏‎١١- من تعبر الحدود التركية اكيد تستخدم GPS يفضل وتستخدم الخرائط مال كوكل افضل شي.
‏‎١٢- الطريق التركي كلش حلو ولا اروع منه عدل ونضيف بس اول ٣٠ كيلو وره حدود شويه طسات شي خفيف والباقي لوز.
‏‎ونصيحتي لاي شخص يريد يطلع بسيارته لازم سواق ٢ لان طريق طويل كلش وقبل لتطلع جيك السيارة مالتك جيك كامل من نوزلات وبلكات وكهربائيات كاملة الراديترات الجوينات مال والفيت بم باتري السيارة تايراتها تخم كامل والصدر واهم شي الدرايف شفت وخصوصًا لاستيك الدرايف شفت، ولازم تحترم الشارع مالتهم وسوق وفق القوانين ولتخالف سعر لتر البانزين بتركيا بدولار محسن بحيث السيارة كلش ترتاح عليه اوكتان ٩٥.